هابي نيو يير 2018

في دوامة الكتابة و"استرجاع" اللحظات عن العام المنصرم، أحب أكتب -لنفسي أولا- وبنرجسية غير معهودة، إن عام 2017 يعد إنجاز هذكره مستقبلا إن عشت أعواما مقبلة، إنجاز ليس كبيرا، فقط أراد لي الله تحقيق ما سموه البشر بلفظ "التخطي"، تخطي ألم وقعت فيه أول العام، وتخطي عمل تركته قبل نهاية العام، وتخطي عدد قليل من البشر تخطوني، لكنه كان أيضا إنجاز بكسب الصدقات الحقيقية، يمكن عندي لسة نهم للاقتراب من ناس في دائرة المعارف، لإني -ورغم مآسي البشر على نفوسنا- مؤمنة إن أثر الصداقة الحقيقية من أقوى التأثيرات، أصدقائنا هم مرايات نرى فيه أنفسنا، ونرى إنجازتنا وإحباطتننا، من أول "اللايك" أو الرسائل وحتى أقوى رسالة وهى الحضن، أو حتى القرب الشخصي، الأصدقاء يرسلوا لك إيمانا مجانيا بك حتى وإن كفرت أنت بك، واعتقد إني مريت هذا العام بلحظات "كفر" بنفسي وبقدراتي، انقذتها لمسات من صديقات عدة، اعتبرهم مكسب الحياة، هم يعلمون ذلك، أو أتمنى إني أكون ناجحة في علاقة صداقة على الأقل، ومن هنا أحب أذكر إني بعتبر شخصية العام بالنسبة لي لو سُمح لي الاختيار هو "شريف قمر"، مش لإنه انتحر لكن لإنه من أكثر المؤثرين فيا بفيديوهاته، يمكن أكون نسيت اسمه وسألت دعاء الفولي برسالة عن اسمه، لكن عمر ما تأثيره راح من نفسي، سواء ضد أو مع الانتحار، لكن لو بتكره الفكرة إلا إنك لن تملك سوى التعاطف مع شريف، الشاب العشريني الذي كان الألم أكبر من قدرته على التحمل، ولم يستطع "المواكبة" مع الظروف والشعارات والكذب المنتشر في الأفق، لكن بيظل سؤال بيراودني وأنا بفتكر شريف، إيه نوع الألم اللي ممكن يكون اتعرضله في الأيام الأخيرة تحديدا؟ كلنا معرضين للسقوط والضعف، لكن قرار التمادي في إنك تضع كلمة النهاية أكيد نتيجة لضغط أكبر، اعتقد - وبشكل رومانسي- إن الأصدقاء "بيخففوا" من هذا الوقع، ولو نسبيا، حتى تمر الغمامة، يعني لن أنسى مكالمات طويلة لصديقة مقربة جدا مساءا، وأنا هنا بشكر قدرتها على تحملي دون أي تمن مني، قدرتها على فتح السماعة في الطرف الأخر والسماع وفقط، هذا الفعل بالنسبة لي لا يٌقدر بثمن، "التقبل" الحقيقي وليس المزيف لا يقدر بثمن، أقول لها ولكل من تقبلوا -على اختلاف مسافاتهم- شكرا وإن كان الشكر غير كاف، وعام سعيد عليكم، وقدرة أكبر على تحمل الألم، وأتمنى أن يملكني الله قليلا من الشجاعة لمواجهة الآلآم، وآثار الكبر التي ترتسم على أهالينا قبل أن تزحف علينا.

انطباعات أفلام 2017

هنا هنقل رأيي الشخصي في عدد من أفلام 2017 وتقييمها الشخصي برضه

Dunkirk

دنكيرك

الفيلم ممتع بصريا، ورغم اني شفته في نايل سيتي وكنت اتمنى اجرب آي ماكس، إلا إن القصة يمكن لم تُحك بطريقة ممتعة، ومع ذلك اعتقد إنه من أفضل الأفلام اللي شوفتها، ويستحق 8 ونص من عشرة.

Mother!

الأم!

اعتقد إن ده تاني أفضل فيلم شوفته السنة دي، أو يمكن في المرتبة الأولى، كعادة دارين ارنوفوسكي، فيه مشاهد في الفيلم تستحق جوائز على خيالها قبل تنفيذها، الفيلم أثر عليا جدا لفترة طويلة، وأعتقد إن تأثيره لسة مستمر، ويستحق 10 من 10.

Wonder Woman

ويندر وومن

بطلة العمل جيل جادوت حلوة، بس الفيلم سخيف، ومضحكتش منه، والحقيقة صدمتي فيه كبيرة لإني بحب فيلم (مونستر) لنفس المخرجة بيتي جانكيز، يستحق 3 ونص.

Get Out

جيت أوت

فيلم حلو جدا، عظمته في طريقة حكيه، والبطل ممثل حلو واقنعني، يستحق يتشاف تاني، 8 من 10.

Fault Condition 

ظروف خاطئة

فيلم روماني عرض في مهرجان القاهرة السينمائي، في رأيي أفضل فيلم شوفته السنة دي، وهرشحه للمشاهدة لأي شخص عايز يشوف قصة حلوة وفي نس الوقت قضية، الشخصيات اترسمت كدة إزاي، الحبكة، التصوير، الانتقال السلس من مشهد لمشهد، إحساسي بكل مشهد، بكا وضحك، 10 متقفلة وقليلة عليه، ومش هنسى إني أول مرة أشوف فيلم في سينما الزمالك وفي حفلة 10 مساءا.

The Nile Hilton Incident

اللي حصل في الهيلتون

قبل ما تيجي الذكرى السادسة لثورة يناير 2011، أي شخص هيسألني ليه حصلت الثورة هرشحله ببساطة إنه يشوف الفيلم ده، فيلم عبقري ولولا الرقابة والمنع كان اتعرض وبقى جماهيري بجد، لكن مفوم منعه ليه، وبطله عنده صراع مهم، هزني مشهده الأخير، حسيت إن الضرب المبرح على جسدي أنا، 8.5 من 10.

baby driver

بيبي درايفر

تالت أحسن فيلم السنة دي، فيلم حلو وممتع، اديجار رايت حكاء عظيم، ومخرج عظيم رغم صغر سنه وتجاربه، ياريت يكون عندنا اتنين ايدجار رايت في الكون، فيلم تاكل معاه فيشار وتتبسط، 9 من 10 عشان بس فيه افيهات مفهمتهاش.

War for the Planet of the Apes

حرب القرود

السنة دي شفت الأفلام الثلاثة في السلسلة، الجزء الثالث أثقل من حيث التقنيات، لكن الأول أفضل من حيث القصة، الأجزاء الثلاثة (وأكثرهم الأخير) مش بيتكلم عن القرود، بيتكلم عن البني أدمين، عن فكرة الحرب والثأر والانتقام، وإن إزاي النفس البشرية وصلت للمنطقة المخيفة دي منها رغم التقدم. 9 ونص من 10.

logan

لوجان

رغم إن ده الجزء الأخير، لكن ده بالنسبة لي الجزء الأول اللي اشوفه من السلسلة للأسف، فيلم عظيم ومؤثر، ودرس في إنك إزاي "تقفل" شخصية بطريقة ناجحة وحلوة ومش تقليدية. 8 ونص من 10.

on body and soul
عن الروح والجسد

فيلم مجري في قائمة الأوسكار القصيرة في الأفلام غير الأميركية، مش فيلم ممتع على المستوى البصري، لكن قصته شديدة الوطأة على نفسي، لدرجة إني فعلا ما استحملتش الجزء الثاني منه، ومعاناة البطلة في البوح عن أزمتها، رغم جمالها الشديد، الفيلم عن الخجل والاحراج والخوف من الناس، والأحلام المشتركة، 7 من 10.

okja

اوكجا

فيلم عبقري، انتاج نيتفليكس، لو في ايدي اعرضه في كل مدارس الأطفال والمكتبات العامة، وبيتكلم بشكل أساسي عن جرائم مصانع اللحوم المدجنة، ورسالة واضحة ضد اللاانسانية في التعامل مع الحيوانات، جاك جلنجهال كان جميل لكن ارتيفيشيال إلى حد ما، 9 من 10.

The Killing of a Sacred Deer
قتل غزال مقدس

ثالث فيلم اشوفه للمخرجد يوغورس لانثيموس، فيلم تقيل برضه على النفس، وفيه ميتافورز كتير، بس أنا محبتوش، زي برضه أفلامه الثلاثة، بس فضل في لا وعيي شوية حلويين. 6 من 10.

killing jesus
قتل عيسى

فيلم جميل عن التسامح وقبول الآخر، تجربة مهة من كولومبيا وفيلم ناطق بالاسبانية، ولولا حاجات كتير كان خدت جايزة معتبرة في مهرجان القاهرة السينمائي. 8 من 10.

the murder on the orient express

الجريمة في اروينت اكسبريس

فيلم جميل وممتع ومفاجىء بالنسبة لي، وكنت محتاجة اشوف فيلم اثارة من فترة بعد أفلام هادفة كتير :) ، وشجعني اني اقرأ لاجاثا كريتسي، يستحق 9 ونص من 10.

the war show

عرض الحرب

فيلم وثائقي بإنتاج كندي عن فتاة سورية وفقدانها لأصدقائها في الحرب، معتقدش إني عيطت بالكم ده داخل قاعة سينما قد ما حصل في الفيلم ده، إنساني وسياسي ومؤثر ولو برضه فيه لجنة تحكيم غير منحازة كان الفيلم خد جايزة محترم في مهرجان القاهرة السينمائي 69، لكن الحمد لله إن الدولة عرضته أصلا بكل القنابل السياسية اللي فيه لبشار وأعوانه. 10 من 10 كأفضل وثائقي شفته هذا العام.

الاصليين

أفضل فيلم مصري شفته السنة دي، عجبني الطريقة والاسقاط، اه مش أفضل ما يمكن أن يقدم من مراد بخياله، بس كان الافضل من مروان حامد مخالد الصاوي وماجد الكدواني، يستحق 7 من 10.

خطيئة نصر محروس

بإمكان نصر محروس إفساح الطريق إلى جديدات يحلمن بوهج الشهرة، بإمكانه منح كل منهم اسما واحدا على طريقته المفضلة، كاميليا، سوما، أو إنجي أمين، بإمكانه أن يستقدم أفضل حنجرة وتسقط في فخ الانتشار والقبول، أو أن يأتي بفتاتين لا أذكر اسميهما للغناء معا في طريق ثاني للبحث ، بإمكان نصر حقيقة أكثر من ذلك، لتاريخه مرة وطموحه مرات، لكن ذلك لن يقترب من فتاته الأصدق والأكثر موهبة وحلما وصوتا وإحساسا ربما لن يتكرر في تاريخ الأغنية المصرية الحديث مرتين، شيرين، سمراء أو قصيرة أو منفلتة اللسان، بعيدة عن أرض الوطن، لا يهم، تلك هى الخطيئة الأولى التي لا يمحيها الزمن، شيرين آه يا ليل هى مرثى لكل المجروحين والفرحين معا حين يغلب كل هؤلاء الحنين إلى الطرب، يا شيرين "حبيته ليه وإزاي قدرت أعلم كدة؟"

فيلم كلاب الحرب أو war dogs

أعتقد إني مش هنسى فيلم war dogs أو كلاب الحرب.

الفيلم هياخد تقييم عالي بالنسبة لي، لأكتر من سبب، أولا إن إيقاعه سريع، فيلم مش ممل. ثانيا فيلم بيحكي القصة بطريقة مبتكرة، عن اتنين من الشباب في العشرينات بيتورطوا "أو بيورطوا نفسهم" في عالم تجارة السلاح. الفيلم قصة حقيقة وده مخليه صعب في انتاجه، لكن بيروح لمناطق أبعد بكتير مما تخيلتها.

ثالثا إن الشخصيات عندها مبررات، لكن الأهم من كدة هو في رأيي تصنيف الفيلم، الفيلم كوميدي دراما وجريمة، نجح إنه يخلق "كوميديا الموقف"، مفيش نكت في الفيلم لكن صعب ما تضحكش، والغريبة إنه في عالم تجارة السلاح الضحك مش شىء سهل.

"جون هيل" فيه تطور كبير في أدائه، الممثل ده "تقيل" ومش مجرد كوميديان بيعمل أعمال خفيفة، ودي خامس نقطة، اللي هتوصل للنقطة السادسة هى في "الزتونة" بتاعة الفيلم وهو المخرج تيد فيلبس، اللي عمل ثلاثية هانج اوفر وdue date. تيد شارك في كتابة "كلاب الحرب" وحقيقي طريقته في الكتابة والاخراج اتطورت كتير، وسحب التطور ده على أداء جون هيل، بالاضافة لأداء مميز من ميلز تيلر وبرادلي كوبر.

الفيلم يبسط. وهديله 9 من 10.

عملية الصحافة

كل يوم عملية -وبقصد كلمة عملية- الصحافة بتكون أصعب وأصعب، ولإننا بنعمل في مجال متعدد المنصات، ومزدحم بالمنافسين، ولا سيما المنافس الأكبر مواقع التواصل نفسها، بيكون التحدي إننا "نخلق" قصص جديدة في دنيا الصحافة، لذلك لما صحفي يكتب إن موضوعه اتسرق بشعر بإن فيه "ضخامة" في التعبيير، أنا نفسي بقيت أقل حدة لو لاقيت فكرة عملتها مُنفذة في موقع آخر، بشكل وأسلوب آخر، مش لإن المعروض وسط المنافسة قليل، لكن لإن رغم "الأفكار المتناثرة على الطرقات"، إلا أن التحديات وضغوط الترافيك بتكون حادة على الصحفيين، والاستسهال كمان، وده كله يمكن بقع فيه بشكل شخصي، طبعا أنا مش بوجه الفرصة للسرقة ولا بدي تصريح لـ"نقش" الموضوعات الصحفية، لكن فيه مساحة من التشابه، التحديات، اللي تخلينا نفكر أصلا في أن مفهوم الصحافة نفسه هو عملية صعبة، من مرحلة الفكرة للنشر ومتابعة ردود الأفعال، ويخلينا نشوف الخط الدقيق بين الأصلي والمهني والكوبي بيست.

#هري_شخصي_جدا

أنت زبون عند مين؟

صناع المحتوى في الوسائط المختلفة بيواجهوا مشكلة رئيسية في فكرة التمويل، وده بيخليهم أمام طريقين، إما الدفع مقابل المحتوى، إما الإعلانات، الطريقين مش سالكين، وفيه تقاطع ما بينهم، وفي نفس الوقت مش سهل الصانع "يقنع" المستهلك بالدفع، ولا سهل كمان يقنع معلن أو يقبل المستهلك بالدخيل الجديد ع المحتوى "الإعلان"، ده غير أزمة إن الإعلان لازم "يتداخل" مع المحتوى، عشان يحقق هدفه.

لكن ده يرجعنا لسؤال مهم، أنت زبون عند مين ومين زبون عندك؟ وزباينك بيلاقوا طلباتهم بشكل جيد وبصورة مستمرة؟ وإيه وضعك التنافسي؟ أسئلة لازم يسألها صناع المحتوى لأنفسهم كل يوم.

المعد الشجرة

من فترة زميلنا محمد منصور نشر بوست وخد جدل كبير عن واحدة بتطلب منه موقع، وناس كتير هاجمته، كان عندي مأخذ على منصور، لكن مفيش شك إن فيه في الوسط - ومش بخص شخص بعينه- مجموعة من المعدين أو الصحفيين أنا بسميهم "شجرة".. بمعنى إنه لا مؤاخذة قاعد في القناة والاعلام بالنسبة له سبايب جنب بعض، وبيستسهل طلب المصادر من الصحفي اللي غالبا - ودي معلومة مض واصلة لهؤلاء الشجرة- تعب.. تاني تعب واجتهد، دور ودعبس، كلم مصادر عشان يوصل لمصدر، حتى لو هينشر ده في موقع مش ترافك النشأة، أو مشهور، لكن في النهاية ده جهده، ده اللي بياخد عليه فلوس -حرفيا- .

وبالتالي، في زمن "الشجرة" بيزيدوا، مش مطلوب من حضرتك كمحرر صحفي تعبت واجتهدت إنك تدي جزء من جهدك ع طبق من الانبوكس أو الرسايل لمحرر "شجرة"، بيستسهل يروح لصحفي، وأصلا بيستسهل يتفرج على المواقع ويجيب أفكار وينفذها للتفزيون - وهنا بتظهر الفوارق أنا معدة تلفزيون وأنت صحفي حقير بتاع موقع ودي طبقية نتكلم عليها بعدين- لكن الهدف من البوست هو إن ثمة فرق كبير جدا بين صحفي أنت عارفه بيجتهد، ومش شرط يكون في دايرة معارفك، لكن عارف إنه زيك طفحان الكوتة، أكل عيشه من عرق جبينه، وبحثه، ودأبه للقصص المختلفة، والمصادر البعيدة، وبالتالي، لما يطلب منك رقم مصدر، بتشعر بـ"فخر"، لإنه وثق فيك وطلب رقم، ولإن مصدرك ده أنت بتحب إنه يظهر لإنك بتكتب عن شخص غالبا إنت مؤمن بيه، أو لإن من الفخر أيضا أن يهتم أحدهم بقصتك في عالم الإعلام الطبقي جدا، من معدين وصحفيين، بين التلفزيون والمواقع.

لكن لما محرر "شجرة يكلمني، ويفتكر إنه -بروح أمه أو أمها- بيمن على اللي بيخلفوني، عشان يطلع مصدري في التلفزيون، أو إني المفروض إدي للخلفوه اعتبار لإنه في التلفزيون، فيه كلام أبيح ممكن يتكتب، ويتقال عادي على فكرة.

بشاير .. من 30 سنة

النهاردة الصبح بالصدفة شفت حلقة "الموهوبون في الأرض" لبلال فضل، كانت عن مديحة كامل، من فنانات الصف الأول لكن يمكن اعتزالها المكبر جعلها لا تكون في سيرة نادية الجندي والهام شاهين وغيرهم، رصيدها 40 عمل فني من أفلام لمسلسلات، واعتزلت الفن في نهاية التمنينات، ومن بين أعمالها البارزة واللي اتفاجئت اني فاكرها بمجرد ما بلال اتكلم عنها هو مسلسل "بشاير"، المسلسل كان بطولة محمود عبد العزيز، بيقدم شخصية ريفي "أبو المعاطي" اللي اشترى حتة أرض بعد ما رجع من بلاد برة، وعليها تم تصوير علم فني بطولة مديحة كامل "سلوى"، وبدأت قصة اعجاب.

المسلسل كان 15 حلقة، مكنش فيه داعي انه "يتمط" ل30 حلقة، مكنش فيه صورة مبهرة قد ما كانت الصورة حقيقية، اتفاجئت ان العمل كتابة وحيد حامد، واخراج سمير سيف، وفيه مجموعة ممثلين مبهرين غير الأبطال، أمينة رزق، سلوى عثمان، سامي مغاوري، أحمد بدير، حسن حسني، عبد العزيز مخيون، وغيرهم، وكل واحد في دور صغير، لكن مهم، ومؤثر في الحكاية البسيطة، اتفاجئت كمان اني لسة فاكرة مشاهد من الحكاية، من أداء محمود عبد العزيز للراجل القروي اللي اتحرك قلبه لما شاف بنت البندر سلوى. العمل مر عليه 30 سنة.. لكن لسة "بخيره".

35 ملاحظة على رمضان 2017.. دراما وإعلانات

1- أداء محمد ممدوح في إعلان فاين فودز "طبق الكرم" أحسن من أدائه مسلسل "لا تطفي الشمس".

2- مدحت العدل محتاج يقلل كرهه للإسلامين شوية ولا يقحمهم في الدراما دون داعِ.. اتعلم من وحيد حامد.

3- أغنية "ملعون أبو الناس العزاز".. إهداء إلى نواب تمرير اتفاقية تيران وصنافير.

4- واحة الغروب.. أكبر دليل أن المسلسل ال15 حلقة الحل الأفضل لكتير من الدراما.

5- اللي بيقطعوا مشاهد من مسلسلات رمضان ويكتبوا عليها عناوين حراقة في يوتيوب.. هما موظفين بياخدوا فلوس على كدة من أصحاب القنوات أو شركات الأنتاج، بس دي طريقة رخيصة جدا عشان نلم مشاهدين لمسلسلات فاشلة.

6- محتاجين وصفة "نيلي كريم" اللي خلاها تخس في 3 حلقات درامية.

7- "لا تطفي الشمس"... وما ذنب إحسان عبد القدوس!

8- إعلانات القيمة المضافة والمطبلاتية من إعلانات الدولة.. هتفدني بإيه لما أسعار كل شئ يغلى الشهر الجاي بعد غلاء المواد البترولية؟

9- محتاجين نعرف الإعلانات اللي مصروف عليها كتير جدا من المنظمات الخيرية بتيجي منين؟ هل من فلوس المتبرعين؟ "صحيح ليه اختفى شعار اتبرع ولو بجنيه؟ تفتكروا ليه؟".

10- "عائشة" بنت نيلي كريم وأحمد فهمي محتاجة تتدرب على التمثيل من "نور" بنت أحمد داوود في هذا المساء.


11- سارة سلامة مش في الفورمة السنة دي.. مفيش هوت شورت، هتعلي أكتر من كدة إيه.

12- السف والعبث ممكن يعمل مسلسل حلو ويضحك من غير صرف كتير.. عن "ريح المدام".

13- طول ما احنا عندنا مسلسلات بتفضل تتصور لغاية 28 رمضان.. طول ما الأخطاء بالجملة هتستمر على الشاشة الصغيرة.

14- جميل جدا إننا ناخد مسلسلات فورمات أجنبية ونعملها لما تكون القصة حلوة.. بس الأحلى إننا نعملها بحرفنة وبطريقتنا، ومن غير مط وتطويل لا داعي ليه.. عن ح ل ا و ة ا ل د ن ي ا.

15- خالد كمال .. رجاء الجداوي.. حنان مطاوع.. جايزة أفضل "بيومي فؤاد" لدراما 2017 بس مبنقولش عشان النحت حلو.

16- عن إعلانات التبرعات.. مش لازم تبقى فيديو كليب وعيال فرحانة بالمرض وألوان وبلابلاين.. حاولوا تبدعوا.

17- قناة تيستي وبانوراما فود أعلى من cbc سفرة.. والسر في البلدي، أكيد طريقة الرز بالكبدة أهم من الكافيا بالبرتقال.

18- طول الإعلانات بينفر الجمهور من الدراما.. كدة انتوا بتخدموا المعلن وبتسلموا الزبون، بس الزبون بيسبكم سنة ورا التانية ويروح النت كل ما كان مسموح، فكروا تحافظوا عليه عشان خسايركم ما تكترش "همسة في أذن أصحاب القنوات الدرامية".

19- "هذا المساء".. الحصان الاسود الحقيقي للدراما في رمضان 2017، عرف يحقق كل حلقة حدث جديد، بتصوير وإضاءة هايلين ومناسبين للشخصيات، وأداء تمثيلي مميز حتى من الأدوار التانية، أسماء أبو اليزي "تقى" ومحمد جمعة "فياض" لامعين جدا، إياد نصار كان بس محتاج يركز أكتر، لكن اتبسطت بشكل عام.

20- "لأعلى سعر".. آخر مرة.. مسلسل حلو لو بيخرجه حد غير محمد "ماندو" العدل، هاتوا منتج كفء على قصة فعلا حلوة.

21- "كفر دلهاب".. لو ده مستوى الرعب في الدراما المصرية، فلاش تنتجوا رعب تاني.

22- "في الالا لاند".. مش هنبطل بقى نتريق على اللي أوزارنهم كبيرة ونفتكر إن ده بيضحك؟ 70% من المصريين بيعانوا من زيادة في الوزن.

23- إعلان مي كساب لزيت حلوة، من الإعلانات المبهجة السنة دي.

24- إعلان محمد رمضان.. في رأيي أكثر إعلان فيه ابداع في فكرته، وبيخدم الشركة والنجم في نفس الوقت.

25- برنامج مصطفى حسني على النهار "رسالة من الله".. مشفتش برنامج ديني رايق ومعمول حلو كدة من فترة كبيرة، حقيقي ألف شكر لكل شخص في فريق عمل البرنامج.

26- الخمرة زي المية.. ممكن تنامي مع راجل غير جوزك وتحسي بتأنيب في الحلقة العشرين.. أول ممثل شاذ على الشاشة .. من إنجازات تامر حبيب في رمضان 2017.

27- محمد شاكر خضير.. يا خسارة المخرج لما يسلم دقنه للمؤلف.

28- أوفة.. محدش بيعملك حساب في إعلان EG bank.. أكتر واحد بيعبر عن الشعب المصري أكتر من برلمانه.

29- 2 مليون جنيه.. جملة ما دفعته شركة أورنج لنقابة الموسيقين لأخذ حقوق الأغنيات القديمة في إعلان هنيدي "واد خلاصة ومية مية".

30- ملحوظة: الفواصل الإعلانية في القنوات الفضائية العربية "إل بي سي- دبي وأبو ظبي" لا تزيد عن 3 دقايق.

31- "كفر دلهاب.. الزيبق.. هربانة منها.. وضع أمني.. أرض جو".. هما أحسن أعمال في رمضان لكل الصحفيين اللي شغالين في إعلام أبو هشيمة، وفي صفاحتهم الفنية، وبيتصلوا بالنقاد يسألوهم عليهم كل يوم، "التعريض" بيطور بس الجمهور أذكى منك كدة والله.

32- برنامج لغسيل سمعة الفلول، وللدفاع عن مؤيدي النظام الحالي، وتأييد السيد الرئيس عبد الفتاح السيسي.. عن "شيخ الحارة" تقدمه بسمة وهبة زوجة رئيس لجنة حقوق الإنسان بمجلس النواب علاء عابد، البرنامج كمان فورماته مسروق من برنامج "أنت وضميرك" على cbc من سنوات.

33- لأ بس إشاعة زواج أحمد سعد وسمية الخشاب عشان دعاية لمسلسل "الحلال" جابت نتيجة فعلا.. محدش بيشوف المسلسل.

34- لغاية رمضان سنة كام هنفضل نشوف مصطفى شعبان؟

35- تعليقات رامز جلال العنصرية على وزن الفنانة الكويتية "منى شداد" سخيفة ودمها تقيل.

جمر النار

الأمر أشبه بطلاق عاطفي، افتراق للأبد يثقل الروح، لا يشفيه العودة، ولا يريحه الابتعاد، تقلب مثالي على جمر النار، للأبد.

إلى ذكرى مجلة الأزهر التي طالعتها اليوم

20 أبريل

إعادة انتاج القصص الصحفية.. كفاية هري يا صحافة

الزميل محمد منصور المحرر العلمي بالمصري اليوم نشر النهاردة الصبح على بروفايله بوست عن أول طبيبة صماء، وكان كاتب في متن البوست إنها في تقرير لبي بي سي، فيه زملاء وصحفيين، ومنهم حد بعتلي البوست، بيحاولوا يوصلوا للطبيبة عشان يصوروا معاها، رغم إنه كتب إنها تم "التصوير" معاها في بي بي سي، والفيديو ملحق في التعليقات، وبرضه فيه تصميم من زملاء إنهم "يعلوا" على بي بي سي، على اعتبار إن المتابع للصحافة مثلا مش بيشوف بي بي سي؟!.

الواحد زمان كان بيغلط الغلطات دي، إنه يكلم شخصيات "اتنحتت"، لكن مع الخبرة ده اسمه فقر في الإبداع، وهري، وحكي في المحكي، الغريبة إني واثقة إن فيه حد هيعمل معاها فيتشير ويكتب عليه "أول حوار مع الطبيبة الصماء"، الواحد مش عارف هل ده استسهال من الصحفيين؟ قلة خبرة؟ القصص مثلا في القاهرة وضواحيها انتهت، الـ100 مليون مصري خلصوا؟!.

أنا كتير بواجهة أزمة في إني ألاقي قصص متفردة، لكن هل النحت هيضيف ليك شئ؟، واحد من أزمة مواقع التواصل إنها للأسف ابعدت الصحفيين عن واقعهم بشكل ما، رغم إنها مفيدة جدا للصحفيين، وجزء من مجال عام بيتيح كتير من القصص، لكن هل الواقع انطفي؟ افتكرت ببوست منصور غرفة اخبار ما كنت شغالة فيها كان مدير تحريرها بيدخل يسأل "شوفولنا الفيس بقى بيتكلم عن إيه النهاردة"، ومن ثم قصة وترافيك ونعلي، لكن افتكرت الكلمة اللي قالها الاستاذ سامي عبد الراضي ليا النهاردة كجزء من تقرير صحفي "لو مخدناش بالنا من مهنة الصحافة هتروح في داهية".

بوست منصور:

https://www.facebook.com/ENGMAM2005/posts/1593610397320557

كان فيه دوت مصر وراح

الواحد بيحاول يكتب أي شيء عن خبر إقالة/استقالة رشا الشامي من دوت مصر لكن للأسف مبقاش فيه مساحة حتى للتفكير في الماضي، التجربة أكبر من رشا وبري ووو، محدش هيعرف قيمة تجربة إعلامية حلمت فيها وفشلت غير اللي كانوا في أول المشروع والحاملين الحقيقين بيها، عبد الله كمال مثلا، يعني زي أنقاض كتير وقعت وجيه بعدها انقاض تانية ولا هتفرح ولا تبطل تفكير في الماضي، أنا حسيت بده لما كنت بمشي من أيام وسط شوارع جاردن سيتي، وبمر من نفس الشوارع، اللي كنا بنجري فيها عشان نلحق مؤتمر او قصة ما، اللي شهد حزن وفرح، الشوارع والمباني والاسانسير ممكن يحكوا عن تجربة دوت مصر اكثر، التجربة اللي تفرد فيها – كعادة الأشياء- غالبا- مجموعة من المعرصين بالمشهد، ويفضل مشهد رحيل رشا زي ان التلفزيون يتحرق لما الشقة تولع، هيفرق كتير؟!

http://www.dotmsr.com/author/ysalama

الدايت حرمان

اللي بيعملوا ريجيم بيدوروا طول الوقت على الأكلات اللي بيحبوها بطريقة دايت، يعني مثلا بيتزا دايت، كيكة دايت، يعني ممكن نحط أي اكلة وجنبها دايت وأكيد بنلاقي الوصفة، الحقيقة ده أكتر شئ محزن بالنسبة لي في مسيرة إنقاص الوزن، لإن في حقيقة مرة وهى أن "لا شئ يبدو كالطعم الأصلي"، وبالتالي في حقيقة مرة تانية وهى "مفيش حاجة اسمها الدايت مش حرمان" الدايت حرمان يا جماعة والله، والطريق محفوف بالبيتزا والكنافة بالجبنة السايحة والشاورما والآيس كريم بالفستق، والطريق ما بيخلصش :D

من شارع خان المعز

من شارع خان المعز بالقاهرة

تصوير: يسرا سلامة