by محمد رفعت on Saturday, September 17, 2011 at 3:41am
أنا شاب فقير فحت .. لدرجة إن بقالي سنة ونص معتمد عالتيشيرات اللي بيجيبهالي أحمد فتح الباب من بلاد برة
بالإضافة إلى إن أمي أول امبارح جابتلي برفيوم (وكان قديما يسمى برفان وقبلها كولونيا وقبلها ريحة بس الأمركة مخلتش للغلبان حاجة) .. وآخر برفيوم قبلها كان عندي من ٣ سنين تقريبا
كانت هذه مقدمة الهدف منها ليس استجلاب عاطفة القراء ، ولكن الهدف الأسمى منها هو مشاركتك أخي القاريء لتتعرف على الكاتب بصورة أكبر
وده اللي مخليني عاوز أقولك إني شخص بيحب السفر .. وتقدر تضيف على اللي فات كلمة "جدا"
وعندي حلم كبير في جياتي بيداعبني (وأحيانا بداعبه أنا) .. وهو زيارة ١٢٠ دولة في العالم قبل ما أموت .. لو ربنا قدر لي مدة تسمح بالهس ده
وبحسبة بسيطة تقدر تقول إني محتاج أعيش ٣٨ سنة كمان .. وأسافر في كل سنة ٣ دول .. يبقى نحقق الهدف ده على سن ٦٢ مثلاعلى اعتبار إني زرت ٦ دول بالإضافة لمصر نحسبها السابعة
على بركة الله
المهم
النوت دي الهدف منها غير عبثي إطلاقا .. ولكنه هدف تشجيعي تحفيذي .. الهدف منه هو إني أزرع جواك الرغبة والشهوة والنزوة والنداء الإنساني اتجاه السفر
والخروج برة القطر الضيق .. إلى سعة الدنيا
أي نعم
أنا مقتنع جدا إن السفر تجربة إنسانية فريدة بتدي الحياة طعم أحلى من السنيكرز
ومقتنع جدا إنها حاجة أقرب إلى الواجب في حياة الإنسان .. وابتعادا عن الكليشيهات .. مش حابب أكتب فوائد السفر أخي المواطن هي كذا وكذا ولكن يكفي إن السفر بيخلي الإنسان يحب الناس .. وبيؤمن جدا إن فيه ناس تانية عايشة في بقع تانية عالأرض .. والناس دول مش وحوش زرقاء تجري في عروقهم الدم الأزرق
وبتكتشف إن الكلام اللي انت كنت حافظه نظري من أيام درس القراءة بتاع رفاعة الطهطاوي اللي كان في ٣ ابتدائي ( أو رابعة مش فاكر) .. هتكتشف إنه كلام عامل زي الحشيش والبودرة .. مينفعش تحس بيه أو تفهم مغزاه الحقيقي إلا لما تجربه
ولذلك
اختصارا للكلام .. النوت دي روشتة قررت أكتبها
بعد ما أكتر من حد سألني في نفس الموضوع ... فقررت إني أكتبها حتى تعم الفائدة
كيف يستطيع الإنسان إنه يسافر ويلف العالم .. بالرغم من إنه فقير فحت؟
(ملحوظة : العالم الأغنيا زي فتح الباب وأنس طلبة وخالد شعبان وأحمد شلبي .. النوت دي مش لأمثالكو .. حيث أن أمثالكو ممكن يصحى الصبح يلاقي نفسه صحي بدري فيطلع عالمطار ياخد طيارة يلف العالم ويرجع .. وبعدها يكتشف إنه نسي يسحب فلوس كفاية من البنك)
----------------
نيجي للمفيد
أولا : السفر إلى الخارج
١) في حالة الطلبة الجامعيين
ابدأ من سنة أولى الدخول على موقع
www.google.com
وده موقع مهم جدا ممكن خلاله تبحث على أي حاجة
ولو انت ناوي تدور على أي شكل من أشكال التعليم برة .. تقدر تدور بكلمات كتير .. أهمها
Scholarship .. fellowship .. diploma .. student exchange program
بالإضافة للمجال اللي انت حابب تدرس فيه
والنت مليان سفريات تعليمية في كل المجالات .. ومش شرط بعد التخرج
بالإضافة إلى المنح اللي بتعملها السفارات كبرامج تبادل طلابي بين أبناء الدولة الأم والدولة المضيفة
٢) في حالة السفر من أجل المتعة والمرقعة لفترات قصيرة
إليكم بعد المواقع الهامة
1) www.scyscanner.net
الموقع ده وظيفته باينة من اسمه كما لا يخفى على نباهتك أخي الكريم
الهدف منه إنك تدور في السما .. تكتب عاوز تروح من فين لفين
وفي أني فترة في السنة
هيكتبلك كل الطيارات اللي بتروح بين المكانين دول في العالم (لكل شركات الطيران اللي في العالم).. بأسعار مختلفة ..ولو لقيت التذكرة غالية ، دور في الطيران اللي بيقف ترانزيت بين الدولتين
ساعات بيبقى أرخص .. بس مش دايما
2) www.booking.com
والموقع ده الهدف منه إنك تلاقيلك مطرح يلمك تبات فيه .. بأي سعر في الدنيا .. وأسعار خاصة للمعفنين والفقرا زي حالاتنا
وطبعا كما يقول المثل المصري الشهير : اطبخي يا جارية ، كلف يا سيدي
ولذلك هتقدر تختار انت عاوز تدفع كام في الليلة ، وهو هيقولك فين الفنادق اللي موجودة في المدينة دي بالسعر ده
وطبعا مش شرط تكون فنادق .. لكن ساعات بيوت شباب .. أو عنابر كدة زي عنابر المساجين .. أو سرير في طرقة فيها خمسين سرير تانيين
يعني على قد لحاف حضرتك مد رجليك .. لو انت لوحدك أو مع صحابك قضيها عفانة يعني
هتفرق معاك ايه تنام في الميريدان ، طالمة العملية ميري والدنيا زي ما تقول كدة شباب في بعضيها
3) www.hostelworld.com
والهوستل هو مكان أقل من الفندق من حيث المستوى والجو ده .. لكنه بردو شغال
أودة بيشاركك فيها كذا حد ، ناس متعرفهمش ، بيبقوا معفنين زي حالاتك بردو وجايين ليلتين وماشيين ، فمبتفرقش معاهم ياخدوا أودة لوحديهم ولا لاوممكن تبقى انت وصحابك تاخدوا أودة بعددكو كلكوا وتبقى بتاعتكو .. وهتبقى أرخص من الفنادق بردو
4) www.ryanair.com
أما هذا الموقع .. فهو البوب لهم جميعا
لو كانت جهة سفرك هي أوروبا .. فالموقع ده هيكون أحسن حاجة في العالم بالنسبالك بعد رؤية مسجد قرطبة الكبير أو قصر الحمراء
إنه الموقع البونبوناية اللي متقولش لعدوك عليه
ممكن من خلال الموقع ده تسافر من بلد لبلد بـ٣٠ يورو ، لا وكمان بـ٢٠ ، وأحيانا بـ١٠ يورو وربنا
يعني نفس تمن أجرة التاكسي من مدينة نصر لأكتوبر
لا تقل إنه شيء مبالغ فيه أخي المواطن .. ولكن استعمل الكي بورد في كتابة العنوان السابق في صفحة الثعلب الناري ، وستجد ما يسرك
هتختار بلد أوروبية هتنطلق منها من قايمة هتلاقيها عندك ، وتختار بلد أوروبية تانية هتسافرلها
وتشوف السعر كام
السعر هيزيد كل ما السفرية تكون قريبة أوي
وهيقل كل ما تكون بعيدة .. بس بردو مش دايما
بس خطوط الطيران بتاعة الموقع ده مختصة بأوروبا بس .. يعني مش خطوط عالمية .. يعني مينفعش تسافر بيها من مصر لأوروبا مثلا
ينفع بس لو انت مواطن مغربي تسافر من المغرب
وفكرة الموقع ده قائمة على إنه بيعتمد على المطارات الصغيرة الفرعية والطيارات الصغيرة
وطبعا لأنها طيارات رخيصة ، فبيدفعك فلوس عالهوا ، بيقولك مش وفرنا عليك تمن الطيران ، خلاص البس بقى
لو معاك شنطة أزيد من ١٠ كيلو هتلبس ، لو معاك شنطة تانية هتلبس ، لو طلبت تشرب أو تاكل عالطيارة هتلبس ، لو اتكلمت مع اللي جنبك هتلبس
بس بردو بعد كل ده هتلاقي إنك مدفعتش كتير .. وهتظل دي أرخض وسيلة وأسرع وسيلة للانتقال بين الدول الأوروبية
وهتكتشف إنك ممكن تصلي الصبح في هولندا ، والظهر والعصر في إيظاليا والمغرب والعشا في أسبانيا
ويبقى مجموع اللي انت دفعته ٣٥ يورو أحيانا يعني ( مش دايما) وساعات أقل كمان .. وساعات أكتر
حسب المواسم ومعاد الحجز ، وحسب دعاء أمك ليك
5) www.airarabia.com
هو النسخة العربية من الموقع السابق
ryanair
وتقدر تقول إن الموقع ده بداية كويسة على خطى الموقع الأوروبي
والهدف منه هو ربط الدول العربية ببعضها عن طريق طيران رخيص
ونفس الفكرة ، بيقوم على المطارات الصغيرة الفرعية اللي مش دايما بتكون في العاصمة
في مصر مثلا .. هتلاقوا مطار برج العرب والنزهة في اسكندرية
ومطار سوهاج وأسيوط والأقصر
لكن طبعا مش هتلاقوا مطار القاهرة
طبعا التجربة لسة مش بنفس روعة النسخة الأوروبية .. وده طبعا سبب أساسي منه عدم وجود أنظمة عربية بيتحط في أولوياتها فكرة الوحدة الجغرافية والثقافية والاجتماعية بين المجتمعات العربية
بس إن شاء الله ده هيتغير كله بعد موسم الثورات العربية المجيدة
6) www.couchsurfing.com
أهو ده بقى ، البونبوناية التانية
بالرغم من إن مش الهدف الأساسي من الموقع ده إنك تلاقيلك مطرح تبات فيه منغير ولا نكلة في أي مكان في العالم
إلا إن محدش يقدر ينكر إنه هدف مهم
الموقع ده اللي عملوه كانوا ناس بيحبوا البشر
وهدفهم إنهم يقربوا المسافات بين الناس ، ويقللوا الحواجز وفروق الثقافات بين بني الإنسان
ويخلوا العالم أكثر أمنا وودا وترابطا
فعملوا فكرة عظيمة جدا .. عملوا موقع يتجمع فيه كل الناس اللي عندها استعداد تستضيف ناس جاية من برة ، منغير فلوس
بحيث تسافر تقعد عند واحد أو عائلة في بيتهم لمدة قصيرة (٣ أو ٤ أيام ده أقصى حاجة) منغير فلوس خالص
والموقع ده فيه عشرات الآلاف البشر المتوزعين في كل أماكن العالم ، اللي عندهم استعداد يرحبوا بضيف في بيتهم ويعرفوه على البلد ويتفسحوا معاه
وهكذا
في الأول هتحب الموقع ده جدا علشان بيخليك تبرطع في أنحاء العالم ببلاش ، بعد كدة هتحبه أكتر علشان بعد كل تجربة احتكاك بناس جديدة هتحس إنك بني آدم
وهتحس إن كلنا ولاد حوا وآدم بجد :)
بس هتحتاج تعمل أكاونت عليه ، وتكتب بياناتك بشكل فيه تفصيل ، وبعدها تراسل أي حد تحب إنه يستضيفك في أي مكان
وأنا جربت بنفسي الموضوع ده كتير وفي كذا مكان في العالم ، شيء جميل وآمن .. مع إنه غريب :)
-----------
اللي فات ده هو حدود علمي على قد اللي شفته أو جربته
لكن أكيد بردو الدنيا فيها أكتر .. واللي هيدور هيلاقي
المهم إنك لما تسافر متهبأش ولا تطفش برة البلد علشان ملبسش أنا في ذنبك وذنب أهلك اللي هيدعو عليا
سافر لأن السفر فضيلة هتزودك وعمرها ما هتقللك
والحياة قصيرة ولازم تطولها بكثرة التجارب
----------------
سافر تجـد عوضـاً عمـن تفارقـه
وانصب فإن لذيذ العيش في النصـبإني رأيـت وقـوف المـاء يفسـده
إن ساح طاب وإن لم يجر لم يطـبوالأسد لولا فراق الأرض ما افترست
والسهم لولا فراق القوس لم يصـبوالشمس لو وقفت في الفلك دائمـه
ًلملها الناس من عجـم ومـن عـربوالبدر لولا أفول منه ما نظرت
إليه في كل حين عين مرتقبوالتبر كالترب ملقـي فـي أماكنـه
والعود في أرضه نوع من الحطـبفـإن تغـرب هـذا عـز مطلـبـه
وإن تغـرب ذلـك عـز كالـذهـب
الإمام العبقري / الشافعي
ليست هناك تعليقات:
إرسال تعليق