وهم "الأيد الواحدة"

على مدار أكثر من ثلاث سنوات ويتردد فى الإعلام وبين المواطنيين مطلب أن يكون كل المصريين "إيد واحدة"، ولا أعلم ما هو الدافع الفعلى لكى نكون جميعا ايد واحدة لما ممكن نكون ايدين و ثلاثة واربعة وأكتر.

الفكرة التى تصوغها الجملة التى كتبت على شاشات وصحف هى أن نكون كلنا "رأى واحد" ، وهو الأمر المستحيل حدوثه بطبيعة الحال، ايه المشكلة اننا نكون ايدين ونتعاون برضه؟ ليه لازم نخلق رأى واحد وكلنا نسير وراه زى "القطيع"؟ ليه لازم قائد واحد ورأى واحد وصوت واحد؟

الجملة المترددة هى نتيجة أكثر من ستين سنة فى حكم البذة العسكرية، ويمكن تطول شوية كمان، بس اللى مش لازم يطول هو وعينا لاننا مش لازم نكون ايد واحدة ، ولا لازم نكون راى واحد..ومش المفترض برضه أن الايد "الواحدة" دى تضرب أى أيادى صغيرة أو كبيرة لإنها واخدة رأى مختلف ، ولا حتى تسعى انها تعمل معها "مصالحة وطنية" .

لازم نفرق بين الاختلاف فى الرأى واننا نحافظ على الحد الأدنى من المشتركات ما بينا، يعنى كلنا مصريين ده مشترك محدش يقدر يناقش حد فيه، ولا حد يزايد على وطنية حد، لكن حضرتك بتغنى "تسلم الأيادى" يبقى مش بالضرورة أى ايد مش بتسلم تبقى تستحق الفرم والهرس.

احنا عمرنا ما كنا ايد واحدة ، ومش هنكون ، لان ده طبيعى ، ال مش طبيعى اننا نقبل فعلا فرم ودهس اى ايد تانية لمجرد انها مختلفة عننا